Khrafa 1 - Mhammed Bessoltane - خرافة 1 : محمد بن السلطان

خرافة محمد بن السلطان نص من كتابة : ماريا حداد جميع الحقوق محفوظة 2020

©

Mouhammed ibn Tughlûq(محمد بن تغلق en arabe)

---

خرافةمحمدبنالسلطان

//جزء1//

ايا سيدي بن سيدي يا مرحوم السلامة يحكيو على سلطان ما رزقو ربي كان بضنا واحد اسمو محمد (mhammed) معروف في المملكة بمحمد بالسلطان

كان محمد بالسلطان ديما يهز حصانو و يخرج يصطاد و الا يدور في ملك ربي لين نهار من النهارات هو كي العادة يدور عالخيالي متاعو جا متعدي على واد هرهار، يلقى عزوزة الستوت الله لا يرحمها نهار الي تمو تعبي في قربة بالماء و سادة عليه الثنية

قلها يا ميمتي ميسالش تبعد شويا وليدك يحب يتعدا

ماباتش تتزحزح

يميمتي يهديك وسع يوسع عليك المولى خلي نتعدا

هاك العزوزة قالت الف و عبد الله كان تتعدا

صبرو فاض... قلها ميمتي نبهتك و تعدا بالحصان.. هاك الحصان عفس في قربة الما فلقها

تقوم عزوزة الستوت الله لا يرحمها نهار الي تموت تقلو و كشاكشها طالعة : يا محمد بالسلطان ما لقيت تتفافى كان على مرا كبيرة؟ موش كان مشيت لوجت على جمال بوك. الي هربلكم بيهم جمل كان خيرلك؟

روح مريض....

//جزء 2//

روح محمد بالسلطان مريض مشا لمو قلها يامي حضرلي زادي و زوادي و مايشg على gلبي و افادي

يا وليدي وين ماشي

قلها ماشي نلوج على جمال بابا الي هربلو بيهم جمل

حضرتلو البسيسة و التمر و قربة بالحليب و قصد ربي هز الخيالي متاعو و سرح في ملك ربي يلوج موش عارف منين يشب و لا منين يبدا

هاو يمشي هاو يمشي تعداو ليام و هوا هكاكا لين وصل لبلاصة خلا و قيفار يرا في غول راقد على وذن و متغطي بوذن

خاف من المنظر و قعد يستنا فيه لين قام من النوم... هو قام و هو شب فيه قو السلام عليكم

قلو الغول:

كان موش سلامك سبg gدامك.. لحمك و لحم حصانك في gدمة و دمك و دم حصانك في جغمة

اش تعمل في بر الغوال و الاهوال يا انسي؟

قلو اني محمد بالسلطان جيت نلوج على جمال بابا الي هربلنا بيهم جمل

قلو اني محمد بالغول انجم نعاونك لمكنتي اني جيعان

خمم محمد لالسلطان بالحيلة كيفاش يشبعو من غير لا ياكلو زادو و زوادو يلقى شجرة حنضل بجنبهم مشا نحا منها بالسرقة و بدا يعطي للغول و هو يزرط هو يعطيه و هو يبلع هو يعطيه و هو ياكل لين شبع

كيف شبع قالو محمد لالغول: وووووووه مامرهم يا محمد بالسلطان يقوم يمدلو عبود بسيسة يحليلو فمو

قلو شبعت يا محمد بالسلطان اما راني عندي خويا محمد بالغول تو نبعثك ليه اكبر مني بليلة و ازيد بحيلة تو يعاونك قلو بعثني ليك محمد بالغول

و مشا محمد بالسلطان لوين بعثو الغول

//جزء 3//

مشا مشا محمد بالسلطان في بلاد الاهوال و الغوال لين وصل يرا في محمد بالغول اكبر من خوه و اضخم من خوه و كي العادة راقد على وذن و متغطي بوذن

استناه لين قام و مشالو هو قلو السلام عليكم و الغول قلو

كان موش سلامك سبg gدامك.. لحمك و لحم حصانك في gدمة و دمك و دم حصانك في جغمة

اش تعمل في بر الغوال و الاهوال يا انسي؟

قلو اني محمد بالسلطان جيت نلوج على جمال بابا الي هربلنا بيهم جمل

قلو اني محمد بالغول انجم نعاونك لمكنتي اني جيعان

خمم محمد لالسلطان بالحيلة كيفاش يشبعو من غير لا ياكلو زادو و زوادو كيما الغول الي قبلو يلقى شجرة حنضل بجنبهم مشا نحا منها بالسرقة و بدا يعطي للغول و هو يزرط هو يعطيه و هو يبلع هو يعطيه و هو ياكل لين شبع

كيف شبع قالو محمد لالغول: وووووووه مامرهم يا محمد بالسلطان يقوم يمدلو عبود بسيسة يحليلو فمو كيما عمل مع خوه

قلو شبعت يا محمد بالسلطان اما راني عندي اختي غولة اكبر مني بليلة و ازيد مني بحيلة هي تعاونك

اما ايجا انبهك كااان مشيت و لقيتها الدجاج لكحل داير بيها و ترضع في ولادها من تالي و تقلي في القمل و ترش في الشعير رد بالك تقربها راهي تاكلك هي و اولادها

و كان لقيتها الدجاج لبيض داير بيها و ترضع في ولادها من صدرها و تقلي في الشعير و ترمي في القمل اجري نقز على زدرها و قلها بزيزلت محمد محمد بالغول!!!!!

و مشا محمد بالسلطان لوين بعثو الغول.....

//جزء4//

ايا هاو يمشي هاو يمشي لين وصل من بعيد يرا في الغولة داير بيها الدجاج لكحل و ترضع في ولادها من تالي و ترمي في الشعير و تقلي في القمل و كشاكشها طالعة خاف من المنظر و تخبى هاو يستنى هاو يستنى لين هزو النوم

هو قام و هز راسو يلقاها الدجاج لبيض داير بيها ترضع في ولادها من قدام و تقلي في الشعير و ترمي في القمل قال هاذي فرصتي جا يجري نقز علاها و قلها الجملة السحرية!!!!

اولاد الغولة هاجو: يامي وذينة يامي نتيشة يامي كبيدة يامي عوينة!!!

قتلهم الغولة: حرمكم خالكم يحرمو مالجنة و نعيمها

اش مجيبك يا انسي!؟؟؟

قلها محمد بالسلطان اني محمد بالسلطان جيت نلوج على جمال بابا الي هربلنا بيهم جمل عاوني...

قتلو باهي برا هز من الخضرة طرف طرف و امشي للبلاصة الفلانية و ابدا برح علي تبيع فيه تو تتشقلك باب في الارض تطلعلك منو الخديمة متع القصر الشفة شفة و الخنافر قد القفة تو تشري من عندك و كي تجي تخلصك قلها نحب تخلصني"سم و اماس" جمع موس

مشا محمد بالغول هز مالخضرة من كل طرف شوية و مشا للبلاصة الي قتلو علاها الغولة هو مازال يبرح و الوصيفة طلعتلو

الشفة شفة و الخنافر قد القفة قتلو هات اشعندك يا راجل مدلها

هبطت بالقضية و طلعتلو بغربال ذهب و لويز

قلها لا لا خلصني غربال سم و اماس

رجعت بدلتلو الغربال و هز قضيتو و رجع للغولة... .

//جزء 5//

هز الغربال للغولة قتلو يا محمد لالغول هاني بش نهزك لوين موجودين جمال بوك اما راني نوصلك و نرجع مبعد لا نعرفك لا

تعرفني اتصرف وحدك ليا و ليك ربي

فرح. محمد بالسلطان و حمد ربي خاطر ماهوش مصدق الي جمال بوه الي ضايعين عندهم سنين بش يرجع بيهم للمملكة و يفك لغز الجمل الي هرب بالجمال

هيا هاو يمشيويمشيو لين وصلو لبلاصة كيف البطحة كبيرة بكلها مبارك متع جمال ممتدة على مد البصر

قتل. الغولة هاذي راهي البلاصة الي الجمال تجي ترقد فيها بعد ما يسرحو نهار كامل

و هزتو لاكبر مبرك فيهم قتلو هاو هذي بلاصة الجمل الي هربلكم بجمالكم برا افرش فيه الماس و السم فيسع قبل لا يطيح الليل و استناه حتى لين يبرك

و مشات و خلاتو

مشا فرش محمد بالسلطان الموضع متع الجمل بالسم و لماس و تخبى و قعد يستنا....

هيا طاح الليل و يسمع في حس الركض و التغرغير متع الجمال جاو لكلهم بش يباتو و يرا فيهم في جمل ضخم كشاكشو طالعة و منظرو يرعب قعد واقف يستنا في الجمال الكل يجي ميتين جمل كل واحد شد بلاصتو

بعد ماتهنا عليهم كل شدو مباركهم مشا برك في بلاصتو... هو برك و بدا يتمحمز هاو عالايمين هاو عالليسار و بدا يغرغر و يعيط و محمد بالسلطان مفجوع خايف و يتفرج من بعيد متخبي

تمحمز هاك الجمل منا و منا لين هفت فرد مرة و ماعادش لا حس لاخبر

فرح محمد بالسلطان و عرف الي هو مات و الي اخيرا بش يرجع بجمال بوه بعد هالسنين لكل

مشا للجمل قعد يغزرلو يغزرلو يغزرلو باهت في عجب ربي كيفاش جمل هرب برسلة كاملة متع جمال

قال هالجمل حكايتو حكاية........ و مد الموس متعو

و حلو كرشو

//جزء 6//

كيف مات زميمهم عزم محمد بالسلطان انو يعرف غريبة هالجمل الي هربلو بجمال بوه.. هز موسو شق كرش الجمل في ثنين و تنقز عليه كلبة حمرة!!

بحرارة الروح عيط فرد عيطة و عرفها جنية من ولاد بسم الله و عطا ساقيه للريح يجري و مايتفتش وراه و الرعب قاتلو

دغبرت هاك الكلبة في الفرس نتشتها طروف طروف و تلفت تلقا محمد بالسلطان هارب بجلدو ... قتلو يا كلب بن كلب وين عندك هارب مني يا اني يا انتي اليوم ناكل من لحمك و نشرب من دمك و هاكا محمد بالسلطان يجري و النفس قريب يتقطع عليه من هول ماشاف.. بعد علا الكلبة يلقى نخلة في قلب الطريق 🌴شب فيها يجري قلها يا نخلة بابا و امي وطي يا نخلة بابا و امي وطي

وطاتلو النخلة نقز تنقيزة وحدة جا فوقها و قلها يا نخلة بابا و امي علي يا نخلة بابا و امي علي علات بيه النخلة و تلهوث في برنوسو يشرب في عرقو.. هو مازال يخمم كيفاه يمنع روحو من هالمصيبة و الكلبة الحمرة تخلط عليه .. مالا تبعت الريحة و الجرة... وقتلو ماعندك وين هارب مني يا كلب بن كلب هاك حصلت....و هاني طالعتلك ليوم فناك يكون مابين سنيا ... و بدات تجري تجري تجري تتكعبر تتكعبر تتخبط تجي في القعمورة

تجري تجري تجري تتكعبر تتكعبر تتخبط تجي في القعمورة

لين عطشت ... مشات تشرب

محمد بالسلطان را في حمام زاجل متع بوه متعدي ناداه قلو اجريلي امشي لبابا السلطان و قلو يبعثلي اسرع فرس و اجدد كروسة ماكانش بش نموت ! و طار هاك الحمام للمملكة و الكلبة باقي عهاك الحال صايدها الكلب و هيتجري تجري تجري تنقز و تهبط تتكعبر تكعبر و تتخبط تجي في القعمورة

لين ماعاش تنجم تهز روحها مالتعب و العطش قتلو ماعندك وين هارب و مشات تشرب

هي مشات و هو باقي بهاك البرنوس ملهوث يستنى في رحمة ربي

//جزء 7//

الكلبة مازالت كيف بعدت و يرا في الكروسة جاية العجاج وراها و الخيالي يرفس بحوافرو لرس زلزلها .. في رمشة عين يلقى الكروسة تحت النخلة قلها يا نخلة بابا و امي وطي وطات هبط و خلا برنوسو فوقها و قلها يا نخلة بابا و امي علي علات

ركب في الكروسة و قال للفرس اجري باقسى ماعندك ماتوقفش لو شنوا يصير و ندهت هاك الفرس لرض دكتها و التربة حيرتها !!!

رجعت هاك الكلبة تغرت بالبرنوس الي مزال فوق النخلة قتلو يا كلب بن الكلب اللليل طاح و ماعاد يمنعك حد المرة هاذي الثالثة ثابتة و برات تجري و تنقز تتخبط تجي في القعمورة، تجري تنقز تتخبط تجي في القعمورة لين في ضربة من الضربات نقزت جات فوق النخلة دغبرت في هاك البرنوس كي الكلب المكلوب فيبالها محمد بالسلطان ... ريشت نتشت تلقاه كلو سوف البرنوس و محمد بالسلطان منع! كي فاقت بيه هرب قتلو يا كلب بن الكلب وين عندك هارب يا اني يا انتي

هبطت تجري اتبع في جرة الكروسة

//جزء8//

في هاك الوقت الي هي تلوج عليه في محمد بالسلطان و اتبع في الجرة وصل محمد بالسلطان للمملكة بعد غياب طويل فرحت بيه و مش مصدقين الي هو رجع من بلاد الغوال و الاهوال....

الشمس زرقت و هاك الكلبة الحمرة مابردت على داها الا ما وصلت للمملكة..من حينها تتقلب في صورة صبية زينها بدعة والعين كيف الودعة الوجه منور سبحانو اش خلق و صور هي دوبا دخلت و يعرضوها زوز صبايحية داخو في زينها تقول حورية من الجنة

تعاركو ..

هاذا يقول متاعي ريتها قبل و هاذا يقول متاعي ريتها قبل.. كلاو بعضهم قريب بش اتطيح الارواح...

قتلهم و انتوما اش لزكم لهذا! هزوني للسلطان هو يحكم بيناتكم

عجبتهم الحكاية و هزوها للسلطان تبهر بيها السلطان و قال هاذي بش ناخذوها لمحمد بالسلطان زين و عين و قد و عينها ماهزتهاش مالقاعة

ايا عملولو عرس سبعة يام و سبعة ليالي

وفا العرس و روحو العرسان لبيتهم

من غدوة طلع الصباح جات التسعة جات العشرة الصبحية تعظات دخلت القايلة و هوما باقي لا خرجو لا قالو حتى جعنا لا عطشنا... ام محمد بالسلطان قالت شنية الحكاية اش فما لتو لا قامو ! بعثت خديمة مالخدام قتلها برا هزلها طبق الماكلة و طل بالسرقة من الباب و جيبلي الخبر

و مشات هاك الخديمة تشوف و عينك ماترا الا النور

//جزء 9//

هاك الجنية تحولت من ليلة العرس ورجعت لصورتها

بركت على محمد بالسلطات بضوافرها تندب فيه ليلة كاملة و هو النفس طالع هابط ماخلاتش بلاصة في بدنو ماندبتهاش ردتلو بدنو نخالة و الدم يشرشر...

هاك الجارية مش مصدقة الي شافتو عينها.. رجعت تجري للسلطانة : يا للا يا للا سيدي باركة عليه كلبة حمرة تندب فيه

هز محمد بالسلطان راسو و قلها ماشي لبيت الراحة نطير الما! قتلو رد بالك تخمم تهرب !

قام بالسيف ساقيه مش حاملينو و حل شباك بيت الراحة و بحرارة الروح رما روحو جا في الزريبة تلفت يلقى بجمبو كوري الاحصنة

//جزء 10 و الاخير //

مشا يجري دخل.. تلفت للفرس الصغيرة اقوى وحدة و اشب وحدة قلها تمنعني؟ قتلو مانمنعكش شوف غيري... تعدا للي بعدها اكبر شوية اما فرس شبابة قلها تمنعني؟ قتلو مانمنعكش... تعدا للي بعدها كيف كيف مابات حتى فرس تمنعو لين وصل لاضعف فرس و اكبر وحدة فيهم لايثة و عظامها يتعدو بالكعبة و حوافرها مشققة بالكبر لا تصلح لا للمصيد لا للماكلة ... قعد يغزر قلها تمنعني؟ قتلو كان تشد روحك نمنعك

ماصدق ربي قتلو هكاكة ركب و قلها انده ! هو هكاكة و الكلبة الحمرة تتلفت تلقاه راكب و هارب.. يا كلب بن كلب تو نوريك و شدت جرتو هي تجري و هاك الفرس تجري و محمد بالسلطان مكبش شادد روحو بالسيف

هي قربت المرة لولة و الفرس تصكها عثرتها

و ترجع تقوم الكلبة هي تجري و الفرس تجري هي تقرب و الفرس تصكها رهوجتها و محمد بالسلطان شادد مكبش و هوما يتجاراو لين المرة هاذي هي قربت و الفرس قتلو شاد روحك ماهو وتعطيها صكة مابين النواضر جابتها مصروعة قتلتها و الثالثة ثابتة.

خلطو عليهم حرس السلطان و يلقاو محمد بالسلطان دايخ و ملطوخ في حضن صبية مزيانة اما عريانة

ولاو ستروها و هزوهم روحو بيهم و هزو هك الكلبة حرقوها بش يرتاحو من بلاها

فاق محمد بالسلطان بعد ايام فهم الي هاكي الفرس الي منعتو هي اميرة مسحورة و ماتنحا عليها السحر الا ما يختارها أمير من الامراء الفرس متاعو و يقودها....عرس بيها و رجع محمد بالسلطان جمال بوه و عاشو في خير و نعمة

و حكايتنا هابة هابة و كل عام يجينا صابة

نص من كتابة : ماريا حداد

جميع الحقوق محفوظة 2020 ©